"Caspian Agro" və "InterFood Azerbaijan" Bakı Ekspo Mərkəzində növbəti dəfə fəaliyyətə başlayaraq regionun aqrar və qida sənayesi üzrə aparıcı platformalarından biri kimi çıxış edir. Sayca 19-cu və 31-ci dəfə təşkil olunan bu tədbirlər dövlət, biznes və elmi dairələr arasında əməkdaşlığın genişləndirilməsi baxımından mühüm əhəmiyyət daşıyır.
Açılış mərasimində çıxış edən Məcnun Məmmədov aqrar sektorun ölkə iqtisadiyyatında prioritet istiqamətlərdən biri olduğunu vurğulayaraq, İlham Əliyev tərəfindən həyata keçirilən islahatların kənd təsərrüfatının modernləşdirilməsinə, istehsalın rəqabət qabiliyyətinin artırılmasına və fermer rifahının yüksəldilməsinə xidmət etdiyini qeyd edib.
Bu il sərgi yeni “Caspian Agro Week” formatında təşkil olunaraq yalnız məhsul və texnologiyaların təqdimatı ilə kifayətlənmir, eyni zamanda forumlar, panel müzakirələri və innovativ təsərrüfatlara səfərləri də əhatə edir. Bu yanaşma aqrar sahədə aktual məsələlərin daha geniş müstəvidə müzakirəsinə və beynəlxalq təcrübə mübadiləsinin gücləndirilməsinə şərait yaradır.
Azərbaycan Qida Təhlükəsizliyi Agentliyi sədri Qoşqar Təhməzli qida məhsullarının beynəlxalq standartlara uyğunlaşdırılmasının ixrac imkanlarını genişləndirdiyini bildirib. Qeyd olunub ki, Azərbaycan məhsulları artıq onlarla ölkəyə ixrac edilir və son illərdə bitkiçilik məhsullarının ixracında artım müşahidə olunur.
KOBİA sədri Orxan Məmmədov kənd təsərrüfatı və qida sənayesində mikro, kiçik və orta sahibkarlığın üstünlük təşkil etdiyini vurğulayaraq, bu sahədə fəaliyyət göstərən subyektlərə göstərilən dəstək mexanizmlərini diqqətə çatdırıb.
Eyni zamanda, AZPROMO icraçı direktoru Yusif Abdullayev yerli məhsulların “Made in Azerbaijan” brendi altında beynəlxalq sərgilərdə tanıdıldığını və yeni ixrac bazarlarına çıxış imkanlarının genişləndirildiyini qeyd edib.
FAO nümayəndəsi Muhammad Nasar Hayat isə qlobal çağırışlar fonunda dayanıqlı və innovativ kənd təsərrüfatının əhəmiyyətinin artdığını vurğulayıb.
Sərgidə ümumilikdə 45 ölkədən yüzlərlə şirkət iştirak edir, bir sıra ölkələr isə milli stendlərlə təmsil olunur. ITE Group rəhbəri Edvard Stroon iştirakçı sayının artım dinamikasının bu tədbirlərin davamlı inkişafını göstərdiyini bildirib.
Tədbir çərçivəsində Kənd Təsərrüfatı Nazirliyinin geniş stendində innovativ texnologiyalar, rəqəmsal həllər, “Smart Agro” konsepsiyası, pilotsuz uçuş aparatları, robototexnika və “green agro” istiqamətləri nümayiş olunur. Bununla yanaşı, regionlardan fermerlərin iştirakı, aqrar biznes festivalları ilə inteqrasiya və müxtəlif dövlət qurumlarının təqdimatları sərginin praktiki əhəmiyyətini daha da artırır.
Ümumilikdə, “Caspian Agro Week” çərçivəsində keçirilən tədbirlər aqrar sektorun inkişaf istiqamətlərinin müəyyənləşdirilməsi, innovasiyaların təşviqi və çoxtərəfli əməkdaşlığın gücləndirilməsi baxımından əhəmiyyətli platforma rolunu oynayır.
"Caspian Agro" və "InterFood Azerbaijan" kimi beynəlxalq platformalar aqrar sahədə tətbiq olunan yeni texnologiyaların və yanaşmaların yaxından izlənilməsi baxımından mühüm əhəmiyyət daşıyır. Sərgidə nümayiş olunan innovativ həllər, xüsusilə rəqəmsal texnologiyalar və müasir texniki vasitələr kənd təsərrüfatının daha səmərəli və dayanıqlı inkişaf istiqamətlərini əks etdirir.
Bu cür tədbirlər aqrar sahədə fəaliyyət göstərən elmi qurumlar, sahibkarlar və fermerlər arasında əməkdaşlığın genişlənməsinə, yeni ideyaların formalaşmasına və qabaqcıl təcrübənin tətbiqinə əlavə imkanlar yaradır. Eyni zamanda, təqdim olunan texnologiyalar yerli şəraitə uyğun innovativ həllərin hazırlanması üçün də mühüm stimul rolunu oynayır.
Mənbə: Azərbaycan Respublikasının Kənd Təsərrüfatı Nazirliyi
