Badamın qərzəkdən təmizlənməsi üçün nəzərdə tutulmuş qurğunun 2024-cü ildə ilkin laboratoriya sınaqları aparılmışdır. Aparılan elmi-tədqiqat müşahidələri və nəticələrin təhlili göstərmişdir ki, qurğuda təmizləmə prosesi işçi kameranın daxilində yerləşdirilmiş rezin işçi elementlər (rezinlər) vasitəsilə həyata keçirilir: rezinlər badamı tutaraq və mexaniki təsir göstərərək onu qərzəkdən ayırır.

Sınaqlar zamanı müəyyən edilmişdir ki, badam nüvəsinin əhəmiyyətli hissəsində əzilmə və zədələnmə halları müşahidə olunmuşdur. Təhlillər göstərmişdir ki, məhsulun çox qırılmasının əsas səbəbi rezin işçi elementlərin normadan artıq uzun olmasıdır. Rezinlərin uzun olması badama lazım olandan artıq təmas sahəsi və təsir müddəti yaratmış, nəticədə nüvəyə düşən mexaniki təzyiq artmış və bu da qırılma faizinin yüksəlməsinə səbəb olmuşdur.

Müəyyən edilmiş çatışmazlığın aradan qaldırılması məqsədilə qurğunun konstruktiv və texnoloji parametrləri üzrə təkmilləşdirmələr aparılacaqdır. Xüsusən rezin işçi elementlərin ölçülərinin (uzunluğunun) optimallaşdırılması, badama tətbiq olunan təzyiqin azaldılması və təmizləmə prosesinin daha yumşaq rejimdə təmin edilməsi istiqamətində texniki həllər işlənib hazırlanacaqdır. Təkmilləşdirmələrdən sonra qurğunun təkrar sınaqlarının keçirilməsi planlaşdırılır.

ZÜLFÜQAR HACIYEV

"Aqromexanika" Elmi-Tədqiqat İnstitutunun "İnformasiya təminatı, patent, marketinq və texniki vasitələr" laboratoriyasının aparıcı mütəxəssisi