24 sentyabr 2026-cı il tarixində "Aqromexanika" Elmi-Tədqiqat İnstitutunda Elmi Şuranın növbəti iclası keçirilmişdir. İclasda İnstitutun rəhbərliyi, Elmi Şuranın üzvüləri, şöbə və laboratoriya müdirləri, eləcə də aparıcı elmi əməkdaşlar iştirak etmişlər.

İclası giriş sözü ilə açan Elmi Şuranın Sədri Kamil Fətəliyev gündəlikdə duran cari və strateji məsələləri şura üzvlərinin diqqətinə çatdırmışdır. İclasın gündəliyinə 2026-cı ilin mövzu planı üzrə 9 aylıq (III mərhələ) hesabatların müzakirəsi, sınaqdan keçirilən aqrar texnikaların vəziyyəti, rəqəmsallaşma və institutsional inkişaf prioritetləri, eləcə də elmi nəşr aktivliyi kimi mühüm məsələlər daxil edilmişdir.

9 aylıq elmi hesabatlar və texniki sınaqların nəticələri

Gündəliyə uyğun olaraq, 2026-cı ilin 9 ayı (III mərhələ) ərzində laboratoriyalar tərəfindən yerinə yetirilmiş elmi-tədqiqat işlərinin qısa hesabatları dinlənilmişdir. Aparılan müzakirələrdən sonra hesabatlar Elmi Şura tərəfindən bəyənilərək təsdiq olunmuşdur.

Eyni zamanda, tədqiqat mərhələsində olan badamı qərzəkdən təmizləyən maşının laboratoriya-sahə sınaqları zamanı üzə çıxan konstruktiv nöqsanlar geniş təhlil edilmişdir. Şuranın qərarı ilə maşının işçi orqanlarında lazımi təkmilləşdirmə işlərinin aparılması və qısa müddətdə təkrar sınaqların keçirilməsi məsul icraçılara və konstruktor qrupuna tapşırılmışdır.

Rəqəmsal aqrar model və institutsional vəzifələr

İclasda Kənd Təsərrüfatı Naziri cənab Məcnun Məmmədovun 15 sentyabr tarixində ADAU- TV-yə verdiyi müsahibədən irəli gələn prioritet məsələlər geniş şərh olunmuşdur. Qeyd edilmişdir ki, müasir aqrar sektorun inkişafı birbaşa rəqəmsallaşma, dəqiq kənd təsərrüfatı, süni intellekt və innovativ texnologiyaların tətbiqi ilə bağlıdır.

Bu çərçivədə, İnstitutun laboratoriyalarının gələcək perspektivliyinin dəqiq və rəqəmsal kənd təsərrüfatı tələblərinə uyğunlaşdırılması, tədqiqatların müasir rəqəmsal həllər üzərində qurulması barədə laboratoriya müdirlərinə konkret tapşırıqlar verilmişdir. Həmçinin, elmi-tədqiqat prosesinin effektivliyini artırmaq üçün əmək intizamı və davamiyyət göstəriciləri üzərində nəzarət mexanizmlərinin gücləndirilməsi qərara alınmışdır.

Beynəlxalq elmi nəşrlər və gələcək hədəflər

İclasın son bölməsində əməkdaşların nəşr aktivliyi və elmi nəticələrin beynəlxalq müstəvidə təbliği məsələlərinə baxılmışdır. III mərhələ üzrə çapa hazırlanmış elmi məqalələrin statusu qiymətləndirilmiş, nüfuzlu beynəlxalq bazalara (Scopus, Web of Science və s.) daxil olan jurnallarda məqalə dərci üzrə fərdi kvotalar və perspektivlər təhlil edilmişdir.

Elmi Şura gündəlikdə duran bütün məsələlər üzrə müvafiq qərarlar qəbul etmiş və illik yekun hesabatlara hazırlıq mərhələsinə start verilmişdir.