"Aqromexanika" Elmi-Tədqiqat İnstitutu və Bitki Mühafizə və Texniki Bitkilər Elmi-Tədqiqat İnstitutu arasında olan əməkdaşlıq çərçivəsində "Aqromexanika" Elmi-Tədqiqat İnstitutunun "Örtülü torpaqlarda istehsal proseslərinin avtomatlaşdırılması" laboratoriyasında “İstixanalarda mövcud mikroiqlim şəraitində tərəvəz becərilməsi üçün ozonlaşdırılmış sudan istifadə texnologiyasının tətbiqi” mövzusunda tədqiqatlar həyata keçirilir.

Tədqiqat işləri çərçivəsində istixana mühitində optimal mikroiqlim göstəricilərinin — temperatur, nisbi rütubət, işıqlandırma səviyyəsi və ventilyasiya rejimlərinin — avtomatlaşdırılmış idarəetmə və nəzarət sistemləri vasitəsilə tənzimlənməsi təmin edilir. Bununla yanaşı, istehsal prosesinin texnoloji mərhələlərindən biri kimi suvarma suyunun ozonlaşdırılması texnologiyası tətbiq olunur və bu məqsədlə suvarma sisteminə xüsusi ozonlaşdırıcı qurğunun tətbiqi həyata keçirilmişdir.

Aparılan elmi araşdırmaların praktik səmərəliliyinin qiymətləndirilməsi məqsədilə modul tipli istixana şəraitində pomidor bitkisi üzərində eksperimental təcrübə işi həyata keçirilmişdir. Hazırkı mərhələdə pomidor bitkisinin fenoloji inkişafının çiçəkləmə fazası üzrə sistemli müşahidələr aparılmaqdadır.